Jarðfræðingar frá öllum norrænu ríkjunum eru saman komnir í Hörpu þessa dagana til þess að taka þátt í Vetrarmóti norrænna jarðfræðinga. Á meðal fyrirlesara og stjórnenda málstofa eru fjölmargir af vísindamönnum Jarðvísindadeildar og Jarðvísindastofnunar Háskóla Íslands.
Þetta er í fjórða sinn sem vetrarmótið er haldið hér á landi en alls hefur það verið haldið þrjátíu sinnum. Mótið hófst mánudaginn 9. janúar og lýkur á morgun, fimmtudaginn 12. janúar.
Á ráðstefnunni koma norrænir jarðvísindamenn saman og miðla nýjustu rannsóknarniðurstöðum sínum ásamt því að stuðla að frekara samstarfi milli norrænu ríkjanna á sviði jarðvísinda. Umfjöllunarefnin eru af ólíkum toga. Þannig er boðið upp á fyrirlestra um áhrif loftlagsbreytinga á jökla ásamt erindum um ýmsar hliðar eldgosa og jarðskjálfta. Þá verður einnig fjallað um hættur af völdum jarðhræringa og auðlindir í jörðu, eins og jarðvarma og olíu, svo eitthvað sé nefnt. Verða fremstu jarðvísindamenn landsins, sem starfa meðal annars við Háskóla Íslands, með fjölmörg áhugaverð erindi.
Ásamt því að ræða það sem efst er á baugi í norrænum jarðfræðirannsóknum verður á ráðstefnunni boðið upp á skoðunarferðir á staði í nágrenni Reykjavíkur sem eru áhugaverðir í jarðfræðilegu tilliti.
Á ráðstefnunni í Hörpu verða Norrænu jarðvísindaverðlaunin jafnframt afhent í fyrsta sinn. Þau eru veitt þeim norræna jarðvísindamanni sem hefur á ferli sínum lagt sitt af mörkum til samfélagsins og jarðvísindanna. Auk þess að fá viðurkenningarskjöld og –skjal flytur verðlaunahafinn fyrirlestur við verðlaunaafhendinguna.
Það er Jarðfræðafélag Íslands sem stendur að ráðstefnunni með aðstoð sérstakrar vísindanefndar sem í sitja meðal annars fulltrúar frá Háskóla Íslands.
