Japanshátíð verður haldin á morgun, laugardaginn 28. janúar, á Háskólatorgi Háskóla Íslands. Þetta er í áttunda sinn sem efnt er til hátíðarinnar en hún er samvinnuverkefninu Sendiráðs Japans á Íslandi og nemenda í japönsku máli og menningu á Hugvísindasviði Háskóla Íslands.
Nemendurnir, um 60 talsins, hafa lagt sig alla fram um að skipuleggja og kynna hin ýmsu atriði sem tengjast japönsku máli og menningu á einstakan og skemmtilegan hátt. Félagsskapur fólks af japönskum uppruna á Íslandi hefur einnig lagt hönd á plóg og stendur meðal annars fyrir japanskri teathöfn og japönskum blómaskreytingum (ikebana). Þar að auki munu ýmis félög vera með sýningu á budo (bardagaíþróttum).
Á aðalsviði Háskólatorgs verður enn fremur haldin spurningakeppni um Japan og japanska menningu og einnig verður boðið upp á lifandi tónlist.
Almennar upplýsingar um nám í japönsku, hina ýmsu skólastyrki og skiptinám við japanska háskóla verður hægt að nálgast á hátíðinni. Auk þessa verður hægt að nálgast upplýsingar um Íslensk-Japanska félagið og Félag Japansmenntaðra á Íslandi.
Hátíðin hefst kl. 13 á Háskólatorgi og lýkur kl. 17. Hún er öllum opin.
Nánari upplýsingar er að finna á http://www.japanfest.net/2012/
