Framtíðarsýn fyrir eitt af þremur höfuðsöfnum Íslands, sem segja má að verið hafi á hrakhólum í nærri 125 ár, er viðfangsefni dr. Helga Torfasonar, safnstjóra Náttúruminjasafns Íslands, í erindi sem hann flytur í Hátíðasal Háskóla Íslands föstudaginn 18. nóvember kl. 16.
Erindið ber yfirskriftina „Náttúruminjasafn Íslands árið 2050“ og er hið síðasta í fyrirlestarröð um framtíðarsýn safnstjóra höfuðsafna landsins sem Félagsvísindasvið og námsbraut í safnafræði við Háskóla Íslands efna til í tilefni af 100 ára afmæli skólans.
Náttúruminjasafn Íslands var stofnað árið 2007. Fyrirrennari þess er hið gamla Náttúrugripasafn sem Hið íslenska náttúrufræðifélag stofnaði 1889 og gaf ríkinu árið 1947. Náttúruminjasafnið er nú í bráðabirgðahúsnæði að Brynjólfsgötu 5 en stærstur hluti safngripa frá Náttúrugripasafninu er enn í vörslu Náttúrufræðistofnunar í Urriðaholti. Sýningargripir sem eru í varðveislu Náttúrufræðistofnunar og hún á að afhenda, skv. bráðabirgðaákvæði í lögum um safnið, hafa enn ekki verið afhentir og því hefur Náttúruminjasafnið hafið söfnun gripa sem henta starfsemi þess, í samræmi við lög. Niðurskurður á fjárframlögum til Náttúruminjasafnsins þýðir enn fremur að ekki hefur verið hægt að opna litla sýningu á Brynjólfsgötu. Við þetta má bæta að Ríkisendurskoðun hefur hafið úttekt á því m.a. hvernig staðið var að stofnun Náttúruminjasafns Íslands og hvað hafi áunnist síðan þá.
Í erindi sínu mun Helgi fara yfir þessa sögu safnsins og viðra hugmyndir um það hvar og hvernig safnið geti risið í borginni. Þá fjallar hann um hvernig samstarf við Háskóla Íslands getur styrkt báða aðila og hvernig safnið ætti að taka mið af sams konar höfuðsöfnum í náttúrufræðum annars staðar á Norðurlöndum. Þau eru öll gamlar og virðulegar stofnanir sem vinna mikilvægar rannsóknir og sýningar þeirra eru stórar og innihaldsríkar og byggðar upp í samvinnu margra aðila.
Um fyrirlesarann
Dr. Helgi Torfason er jarðfræðingur að mennt. Hann lauk BS-prófi frá Háskóla Íslands 1974 og doktorsprófi frá háskólanum í Liverpool. Sérsvið hans eru jarðfræði jarðhita, gerð jarðfræðikorta og vernd jarðminja. Helgi hefur verið sérfræðingur á sviði jarðhita fyrir Þróunarstofnun Sameinuðu þjóðanna (UNDP) með aðsetur í Kenía, sérfræðingur á auðlindadeild Orkustofnunar og unnið sem fagsviðsstjóri jarðfræðisviðs Náttúrufræðistofnunar Íslands.
Helgi hefur unnið að fjölmörgum rannsóknaverkefnum á sviði jarðfræði og skrifað fjölmargar greinar og skýrslur á því sviði. Hann hefur setið í dómnefndum um akademískar stöðuveitingar við Háskóla Íslands og einnig setið í setið í ýmsum ráðum og nefndum, situr t.am. í Safnaráði nú.
Fyrirlestur Helga verður sem fyrr segir í Hátíðasal Aðalbyggingar Háskóla Íslands föstudaginn 18. nóvember kl. 16. Allir áhugasamir eru velkomnir meðan húsrúm leyfir.
