Fátækt og fúlga - Þurfalingarnir 1902

Út er komin bókin Fátækt og fúlga - Þurfalingar 1902 eftir þá Sigurð Gylfa Magnúson prófessor og Jón Ólaf Ísberg. Bókin er sú nítjánda í ritröðinni Sýnisbók íslenskrar alþýðumenningar en röðin hóf göngu sína árið 1997 og er unnin á vegum Miðstöðvar einsögurannsókna í Sagnfræðistofnun Háskóla Íslands.

Fátækt á Íslandi hefur verið íslenskum ráðamönnum hugleikið viðfangsefni allt frá landnámi. Umræðan fékk aukið vægi á dögum upplýsingarinnar og hefur löngum verið áhersluatriði í rökræðum manna á milli síðan. Árið 1902 var tekin saman að undirlagi nefndar Alþingis yfirgripsmikil skrá yfir alla þá einstaklinga á Íslandi sem þegið höfðu af sveit það árið og töldust þannig til þurfalinga.

Í bók þeirra Sigurðar og Jóns er fjallað um starf þingnefndarinnar, skráin birt í heild sinni og greint frá viðbrögðum þingheims við tillögum hennar. Hver voru örlög fátæks fólks á þessum tíma og hvernig tókst það á við fordóma samtíðar sinnar? Höfundar bókarinnar glíma við álíka spurningar þegar þeir fjalla um fátækt á Íslandi frá ýmsum hliðum.