Ein stærsta ráðstefna á sviði viðskiptafræði

Viðskiptafræðideild Háskóla Íslands hefur fengið réttinn til þess að halda ráðstefnuna European Academy of Management (EURAM) á Íslandi árið 2018. Ráðstefnan er ein sú stærsta á sviði viðskiptafræði í Evrópu og stærsta ráðstefna sem haldin hefur verið á þessu sviði á Íslandi. Áætlað er að um 1.200-1.400 manns sæki ráðstefnuna erlendis frá.

EURAM er þekkingarsamfélag háskóla í 49 löndum sem stofnað var árið 2001 og miðar að því að efla rannsóknir og þekkingarsköpun í viðskiptafræði. Ráðstefna EURAM 2016 verður haldin í París í Frakklandi undir yfirskriftinni Manageble Cooperation.

Undirbúningsnefnd EURAM 2018 telur það mikinn feng fyrir Háskóla Íslands að ráðstefnan verði haldin á Íslandi. Hún muni efla alþjóðlegt samstarf og rannsóknir í viðskiptafræði við Háskóla Íslands og vekja áhuga erlendra fræðimanna á Íslandi.

Umsóknarferlið vegna ráðstefnunnar var unnið í samvinnu Háskóla Íslands, Meet in Reykjavik, Reykjavíkurborgar og Embætti Forseta Íslands. Formaður undirbúningsnefndar EURAM 2018 er Dr. Eyþór Ívar Jónsson, forstöðumaður Rannsóknarmiðstöðvar um stjórnarhætti og lektor við Háskóla Íslands.