Á mótum danskrar og íslenskrar menningar

Hjá forlaginu Vandkunsten í Kaupmannahöfn er komin út bókin Gullfoss. Mødet mellem dansk og  islandsk kultur i 1900-tallet. Í bókinni er dregin upp önnur mynd af samskiptasögu Danmerkur og Íslands en hingað til hefur tíðkast. Í stað sjálfstæðisbaráttu Íslendinga og stjórnmálatengsla þjóðanna er kastljósinu beint að Dönum búsettum á Íslandi og dönskum áhrifum á íslenskt samfélag og menningu á 20. öld. Fjallað er um hvernig Danir aðlöguðust íslensku mannlífi en einnig hvernig þeir héldu sínum menningareinkennum og höfðu áhrif á íslenska menningu, viðskiptalíf og samfélag. Einnig er fjallað um áhrif dönskunnar á Íslandi og málið sem Danirnir töluðu. Þá hefur bókin að geyma grein um hvernig Ísland birtist í skrifum danskra rithöfunda.

Í bókinni eru níu greinar eftir sjö höfunda: Auði Hauksdóttur, Christina Folke Ax, Guðmund Jónsson, Írisi Ellenberger, Erik Skyum-Nielsen, Sigurð Pétursson og Þóru Björk Hjartardóttur. Formála að bókinni rita Vigdís Finnbogadóttir og Jørn Lund, en auk þess er ítarlegur yfirlitskafli um rannsóknir á samskiptasögu landanna.

Efni bókarinnar byggist að mestu leyti á niðurstöðum rannsóknarinnar Á mótum danskrar og íslenskrar menningar. Danir á Íslandi 1900-1970, sem var samstarfsverkefni Sagnfræðistofnunar Háskóla Íslands, Stofnunar Vigdísar Finnbogadóttur í erlendum tungumálum og Institut for Nordiske Studier og Sprogvidenskab við Kaupmannahafnarháskóla. Í rannsókninni voru tekin viðtöl við hátt á fjórða tug Dana sem búið hafa á Íslandi.

Ritstjórar bókarinnar eru Auður Hauksdóttir, Erik Skyum-Nielsen og Guðmundur Jónsson.

Bókin er 455 blaðsíður að lengd og prýdd fjölda mynda. Háskólaútgáfan sér um dreifingu bókarinnar hér á landi.