Háskóli Íslands

0% englar sigruðu í Lego-hönnunarkeppni FLL

Liðið 0% englar frá Brúarásskóla á Fljótsdalshéraði bar sigur úr býtum í tækni- og hönnunarkeppni grunnskólanemenda, FIRST LEGO League (FLL), sem lauk í Háskólabíói nú á fimmta tímanum. Liðið vann sér um leið þátttökurétt á Evrópumóti FIRST LEGO League í vor.
 
Alls voru þrettán lið víða af landinu skráð  í keppnina að þessu sinni, eða um 140 grunnskólanemar á aldrinum 10-15 ára. Keppnin hófst kl. 9 í morgun á því að liðin spreyttu sig á þraut tengdri þema keppninnar, sem í ár var náttúruöfl.  Áttu þau að forrita vélmenni úr tölvustýrðu LEGO-i til að leysa þrautina. Enn fremur gerðu keppendur vísindalega rannsókn á ákveðnu efni sem einnig var tengt þemanu og jafnframt héldu liðin ítarlega dagbók um undirbúning fyrir keppnina. Þá fluttu liðin skemmtiatriði á sviðinu í stóra sal Háskólabíós og að lokum þurftu þau að gera grein fyrir því hvernig þau forrituðu vélmenni sitt.
 
Þegar upp var staðið reyndist liðið 0% englar sigurvegari, en það er skipað sjö stúlkum úr Brúarásskóla á Fljótsdalshéraði. Þær fengu einnig verðlaun fyrir bestu lausn í vélmennakappaleik. Í viðurkenningarskyni fyrir sigurinn hlaut liðið forláta LEGO-bikar ásamt verðlaunum frá Símanum og Krumma. Þá vann sigurliðið sér jafnframt  keppnisrétt á Evrópumóti First Lego League sem haldið verður á Spáni í lok maí nk. 
 
Auk sigurverðlauna voru veitt verðlaun í ýmsum flokkum, sem hér segir:
Besta skemmtiatriðið: El Grilló frá Seyðisfjarðarskóla
Besta liðsheildin: Krapaflóð frá Grunnskóla Fáskrúðsfjarðar
Besta dagbókin: Hnjúkarnir frá Grunnskóla Hornafjarðar
Besta lausn í vélmennakappleik: 0% englar frá Brúarásskóla
Besta hönnun og forritun vélmennis: Bakkabræður frá Breiðholtsskóla
Besta rannsóknaverkefnið: Molten frá Naustaskóla á Akureyri
 
Þá hlaut liðið Molten enn fremur gjafabréf í Háskóla unga fólksins í Háskóla Íslands næsta sumar, en verðlaunin voru dregin úr potti með öllum liðum. Allir þátttakendur í keppninni fengu enn fremur FLL-medalíu í viðurkenningarskyni.
 
Þetta var í áttunda sinn sem FIRST LEGO League tækni- og hönnunarkeppnin var haldin en markmiðið með henni er að blása ungu fólki í brjóst löngun til að skara fram úr á sviði tækni og vísinda. Verkfræði- og náttúruvísindasvið og Menntavísindasvið Háskóla Íslands halda utan um keppnina en helstu bakhjarlar hennar eru Nýherji, Síminn, Krumma, Össur, Verkfræðingafélag Íslands, Tæknifræðingafélag Íslands, VSÓ ráðgjöf, ÍTR, Kjörís, Vífilfell, MS, Melaskóli og Mannvit.
 
Laugardagur, 1. febrúar 2014 - 17:30
Þú ert að nota: drupalcl2.rhi.hi.is