Meistaranám í alþjóðasamskiptum er hagnýtt, fjölbreytt og fræðilegt nám fyrir alla sem lokið hafa BA-, BS-, BEd- eða sambærilegu prófi, óháð grunnnámi. Námið, sem er einstakt á Íslandi, býður nemendum upp á að afla sér þekkingar á alþjóðasamskiptum með áherslu á utanríkismál Íslands. Námið hefur verið rekið í á annan áratug við góðan orðstír og nemendur hafa haldið áfram í doktorsnám, farið í störf hjá hinu opinbera, einkafyrirtækjum, frjálsum félagasamtökum og alþjóðastofnunum.
Boðið er upp á fjölbreytt valnámskeið og geta nemendur sérhæft sig á ýmsum sviðum, t.d. í tengslum við Evrópumál, smáríkjafræði, norðurslóðafræði og öryggis- og varnarmál. Nám í alþjóðasamskiptum hér á landi kemur til móts við þarfir stórs hóps fólks sem á ekki auðvelt með að flytja til annarra landa og dvelja þar langdvölum.
Við skipulagningu námsins var höfð hliðsjón af námi í fremstu skólum Bretlands og Bandaríkjanna á þessu sviði, auk þess sem tekið er tillit til sérstöðu Íslands í alþjóðlegu samhengi utanríkismála og alþjóðasamskipta. Námið stenst fyllilega samanburð við það sem best gerist erlendis.