Viðfangsefni upplýsingafræðinnar

Tveggja ára fræðilegt framhaldsnám (rannsóknatengt framhaldsnám) í upplýsingafræði (áður bókasafns- og upplýsingafræði) í Félagsfræði-, mannfræði- og þjóðfræðideild Háskóla Íslands. Námið er 120e og er fullgilt próf til prófgráðunnar magister artium, MA.

Þeir sem taka MA-próf í upplýsingafræði bæta við sig tveimur árum í sjálfstæðu fræðilegu rannsóknarnámi. Það felst annars vegar í viðamikilli ritgerð (40-60e) og hins vegar í námskeiðum á völdum sviðum svo og námskeiðum í rannsóknaraðferðum og kenningum. Nemendur skulu hafa lokið BA, BS eða B.ed.-prófi frá Háskóla Íslands eða sambærilegu námi með fyrstu einkunn. Hverjum nemanda er skipaður umsjónarkennari við upphaf námsins.

Námið er ætlað þeim sem lokið hafa háskólagráðu í annarri grein en upplýsingafræði (áður bókasafns- og upplýsingafræði), BA, BSc, BEd eða sambærilegu prófi.

Námið er tveggja ára (120e) fræðilegt og hagnýtt framhaldsnám (rannsóknatengt framhaldsnám) í upplýsingafræði við Félagsfræði-, mannfræði- og þjóðfræðideild Háskóla Íslands sem uppfyllir skilyrði íslenskra laga um rétt manna til að sækja um lögverndað starfsheiti hjá mennta- og menningarmálaráðuneyti að námi loknu. 

Nemendur geta lokið skyldunámi sem gerð er krafa um í MIS-námi og valið valnámskeið í samráði við leiðbeinanda við lokaverkefni eða valið um eftirfarandi kjörsvið: Upplýsingahegðun: Skipulagning, stjórnun og miðlun upplýsinga og þekkingar og Upplýsingastjórnun: Skráning, aðgengi og öryggi upplýsinga hjá skipulagsheildum. 

Krafist er lágmarkseinkunnar (5,0) í öllum þáttum námsmats í öllum námskeiðum í upplýsingafræði.

Nemendum er bent á mikilvægi þess að taka námskeið í aðferðafræði á 2. ári námsins.

Diplómanám í upplýsingafræði (áður bókasafns- og upplýsingafræði) er ætlað fólki úr öðrum námsgreinum, og bókasafns- og upplýsingafræðingum sem vilja sækja sér sérhæfingu í greininni sem þeir hafa ekki lokið áður. Um er að ræða eins árs nám sem samanstendur eingöngu af námskeiðum, alls 30 einingar. Hægt er að velja á milli tveggja kjörsviða.

Doktorsnám við Félagsfræði-, mannfræði- og þjóðfræðideild er 180 eininga doktorsritgerð og 30 einingar í námskeiðum á fræðasviði doktorsverkefnis.  Til viðbótar getur námsbraut gert kröfu um að doktorsnemandi taki allt að 60 ECTS í námskeiðum í samráði við leiðbeinanda sé talin þörf á að bæta við undirstöðuþekkingu hans í aðferðafræði rannsókna eða á fræðasviði doktorsnámsins. Þessum einingum skal að jafnaði lokið áður en rannsóknaráætlun fæst samþykkt.

Bóknámshluta námsins má sinna jafnt í lesnámskeiðum sem almennum námskeiðum á framhaldsstigi. Nemendur sem hefja doktorsnám skulu hafa lokið meistaraprófi með fyrstu einkunn, eða sambærilegu prófi  við viðurkenndan háskóla.

Umsóknarfrestur um doktorsnám er tvisvar á ári, 15. apríl og 15. október en einu sinni á ári, 1. febrúar, fyrir erlenda umsækjendur. Umsókn skal skilað til nemendaskrár Háskóla Íslands á sérstöku rafrænu eyðublaði sem aðgengilegt er á vef skólans á umsóknartíma. Fylgiskjöl skal senda til Félagsfræði-, mannfræði- og þjóðfræðideildar á rafrænu formi.

Umsóknareyðublöð um styrki úr rannsóknarnámssjóði fást á skrifstofu Vísinda- og nýsköpunarsviðs, Aðalbyggingu Háskóla Íslands.

Doktorsnemi skal frá upphafi náms hafa leiðbeinanda. Leiðbeinandi skal vera fastráðinn kennari (prófessor, dósent eða lektor) við Félagsfræði-, mannfræði- og þjóðfræðideild Háskóla Íslands. Þeim sem áhuga hafa á að hefja doktorsnám í greininni er bent á að byrja á því að hafa samband við þann úr hópi fastra kennara námsbrautarinnar sem þeir telja vænlegastan leiðbeinanda með væntanlegu doktorsverkefni. Vakin er athygli á að námsbrautin getur ekki tekið við mörgum doktorsnemum og kennurum við námsbrautina er ekki skylt að hafa umsjón með doktorsritgerðum.