Fötlunarfræði er fræðigrein sem leggur áherslu á félagslegan skilning á fötlun og þátt menningar og umhverfis í að skapa og viðhalda fötlun. Markmið námsins er að veita nemendum fræðilega og hagnýta þekkingu á fjölbreytilegum þáttum sem varða fatlað fólk og mannréttindi þess. Nám í fötlunarfræði er þverfaglegt og nemendur koma m.a. af sviðum félags-, hug- mennta- og heilbrigðisvísinda. Áhersla er lögð á að nemendur geti fléttað viðfangsefni fötlunarfræðinnar við sín áhugasvið. Námsbraut í fötlunarfræðum er rekin í öflugu alþjóðlegu samstarfi og nemendur eiga möguleika á að taka hluta námsins erlendis. Náið samstarf er við Rannsóknarsetur í fötlunarfræðum en þar er unnið að fjölmörgum innlendum og erlendum rannsóknarverkefnum. Fötlunarfræði, Rannsóknanám, MA ,120e Meistaranám í fötlunarfræði er tveggja ára nám ætlað þeim sem vilja efla fræðilega þekkingu sína á fötlun og málefnum fatlaðs fólks. Nemendur geta sérhæft sig á ákveðnum sviðum allt eftir áhuga hvers og eins. Markmið námsins er að mennta fólk til leiðandi starfa. Námið nýtist á víðtækum vettvangi s.s. við rannsóknir, stefnumótun, réttindagæslu, störf innan þjónustukerfisins og á vettvangi baráttusamtaka fatlaðs fólks. Námið er 120 einingar nám til prófgráðunnar MA og lýkur með 30-60 eininga meistararitgerð. Fötlunarfræði með áherslu á margbreytileika, MA 120e Meistaranám í fötlunarfræði með áherslu á margbreytileika er tveggja ára nám. Náminu er ætlað að veita nemendum fræðilega og hagnýta þekkingu á fötlun sem einum þætti í margbreytileika mannlífsins. Fjallað er um hvernig fötlun tengist öðrum félagslegum þáttum, s.s. kyni, kynhneigð, þjóðernisuppruna, aldri og stétt, með sérstakri áherslu á samtvinnun þessara þátta í daglegu lífi. Námið er 120 eininga nám til prófgráðunnar MA og lýkur með 40 eininga meistararitgerð. Fötlunarfræði og opinber stjórnsýsla, MA 120e Meistaranám í fötlunarfræði og opinberri stjórnsýslu er tveggja ára nám sem undirbýr nemendur til starfa að málefnum fatlaðs fólks hjá ríki, sveitarfélögum eða félagasamtökum. Markmið námsins er að nemendur öðlist fræðilega og hagnýta þekkingu um fatlað fólk og málefni þess með áherslu á færni á sviði stjórnunar og stjórnsýslu. Námið er 120 eininga nám til prófgráðunnar MA og lýkur með 30 eininga meistararitgerð. Fötlunarfræði, diplómanám, 30e Boðið er upp á diplómanám í fötlunarfræði og diplómanám í fötlunarfræði með áherslu á opinbera stjórnsýslu. Diplómanám í fötlunarfræðum (30 einingar) er ætlað þeim sem hafa áhuga á að auka þekkingu sína á því sem efst er á baugi í tengslum við fötlun og málefni fatlaðs fólks. Markmið námsins er að nemendur kynnist helstu stefnum og straumum innan fötlunarfræða. Diplómanám í fötlunarfræðum með áherslu á opinbera stjórnsýslu (32 einingar) er ætlað þeim sem vinna með eða hafa hug á að vinna með fötluðu fólki í opinberri stjórnsýslu. Í náminu er lögð sérstök áhersla á sveitarstjórnarstigið. Markmið námsins er að nemendur fái fræðilega og hagnýta þekkingu um fatlað fólk og málefni þess. Hægt er að fá diplómanám metið sem hluta af MA-námi í fötlunarfræðum að uppfylltum inntökuskilyrðum. Fötlunarfræði, Doktorsnám, 210e Doktorsnám við Félags- og mannvísindadeild er 180 eininga doktorsritgerð og 30 einingar í námskeiðum á fræðasviði doktorsverkefnis. Til viðbótar getur námsbraut gert kröfu um að doktorsnemandi taki allt að 60 einingar í námskeiðum í samráði við leiðbeinanda sé talin þörf á að bæta við undirstöðuþekkingu hans í aðferðafræði rannsókna eða á fræðasviði doktorsnámsins. Þessum einingum skal að jafnaði lokið áður en rannsóknaráætlun fæst samþykkt. Bóknámshluta námsins má sinna jafnt í lesnámskeiðum sem almennum námskeiðum á framhaldsstigi. Nemendur sem hefja doktorsnám skulu hafa lokið meistaraprófi með fyrstu einkunn, eða sambærilegu prófi við viðurkenndan háskóla. Umsóknarfrestur um doktorsnám er tvisvar á ári, 15. apríl og 15. október (30. október 2020) en einu sinni á ári, 1. febrúar, fyrir erlenda umsækjendur. Rafræn umsókn er aðgengileg á vef skólans á umsóknartíma. Frekari upplýsingar um doktorsnám fást hjá Félagsfræði-, mannfræði- og þjóðfræðideild. Fötlunarfræði Fötlunarfræði facebooklinkedintwitter
