Markaðs- og samskiptasvið stuðlar að því að ytri og innri hagsmunahópar hafi skýra mynd af hlutverki Háskólans. Helstu verkefni markaðs- og samskiptasviðs ráðast að miklu leyti af áherslum sviðsins. Sviðið mótar markaðs-, kynningar- og ímyndarstarf Háskólans í heild sinni í samvinnu við rektor Háskóla Íslands, háskólaráð og markaðs- og kynningarráð Háskólans. Markaðs- og samskiptasvið samþættir starfið milli einstakra eininga.
Í þessu sambandi má nefna víðtæka upplýsingamiðlun um starf inn Háskólans eftir helstu boðleiðum sem tiltækar eru. Hér er m.a. átt við miðlun á vefsvæði Háskólans, fjölþætt samskipti við fjölmiðla, gerð, hönnun og útgáfu kynningarefnis, umsjón með stærri viðburðum Háskólans. Undir það síðasttalda falla kynningar á námsleiðum Háskólans fyrir framhaldsskólanema og hagsmunaaðila auk úthlutunar styrkja á vegum skólans. Markaðs- og samskiptasvið ber ábyrgð á samskiptum við hollvini, velunnara og stjórnir styrktarsjóða Háskólans, samfélagslegri vísindamiðlun auk ráðgjafar og fræðslu um markaðsmál sem veitt er innan Háskólans.
Í megindráttum eru verkefni markaðs- og samskiptasviðs eftirfarandi:
- Mörkun stefnu um fagleg innri og ytri samskipti Háskóla Íslands.
- Yfirstjórn ytri vefs og mörkun vefstefnu í samvinnu við sérstakan vefstjórnarhóp.
- Eftirfylgni við framangreindar stefnur.
- Upplýsingamiðlun á innri vef og þróun hans.
- Samskipti við fjölmiðla.
- Stjórnun viðburða á vegum Háskóla Íslands ásamt faglegri ráðgjöf og aðstoð í tengslum við viðburði.
- Útgáfa markaðs-, kynningar- og fréttaefnis í nafni Háskóla Íslands.
- Aðstoð og ráðgjöf við vinnslu markaðs- og kynningarefnis fyrir allar einingar.
- Auglýsingamál Háskóla Íslands.
- Mótun hollvinastarfs og innleiðing á slíku starfi.
- Umsjón og umsýsla með starfsemi Styrktarsjóða Háskóla Íslands.
- Gerð samninga við samstarfsaðila um markaðs- og kynningarmál.