Háskóli Íslands ætlar sér að vera í fararbroddi á sviði rannsókna, menntunar og fræðslu á öllum sviðum umhverfismála, sérstaklega þeim sem varða Ísland. Þá beitir hann sér fyrir auknu samstarfi við aðra háskóla og rannsóknastofnanir um umhverfismál. Háskóli Íslands miðlar almenningi, stjórnvöldum og fyrirtækjum af þekkingu sinni á umhverfismálum og veitir ráðgjöf og upplýsingar eftir því sem kostur er.

Í daglegu starfi skólans og við stefnumótun er leitast við að valda sem minnstri mengun og álagi á auðlindir og umhverfi. Háskóli Íslands hagar byggingaframkvæmdum og viðhaldi mannvirkja og lóða þannig að sem minnst umhverfisspjöll hljótist af. Umgengni starfsmanna og stúdenta um lóð og byggingar Háskólans skal vera til fyrirmyndar.