Samstarfssamningur Háskóla Íslands
og Landsbókasafns Íslands - Háskólabókasafns
1 Inngangur
Aðilar samnings þessa eru Háskóli Íslands (H.Í., „Háskólinn“) og Landsbókasafn Íslands – Háskólabókasafn (Lbs-Hbs, „safnið“).
Samningurinn gildir til fimm ára frá undirritun. Heimilt er að gera breytingar á honum á samningstímanum með samþykki samningsaðila.
2 Markmið samnings og hlutverk samningsaðila
Megintilgangur háskólastarfsemi er skipuleg viðleitni til að afla, skapa og varðveita þekkingu og miðla henni til nemenda, fræðasamfélagsins og almennings. Með því samstarfi H.Í. og Lbs-Hbs, sem formfest er með þessum samningi, er verið að efla safnið sem háskólabókasafn og taka mið af þróun H.Í. sem rannsóknarháskóla.
Helstu markmið þessa samnings eru:
- Að vinna að uppbyggingu safnsins sem þekkingarveitu bæði almennt og á sérhæfðum sviðum í samráði við deildir Háskólans. Í því skyni er lögð sérstök áhersla á rafrænar áskriftir og rafræna miðlun upplýsinga.
- Að tryggja aðgang nemenda og starfsfólks Háskólans að fræðilegu efni án tillits til búsetu.
- Að tryggja öfluga notendafræðslu sem miði að upplýsingalæsi háskólanema og nái til allra deilda H.Í.
- Að styrkja safnið sem rannsóknarstofnun á sviði bókfræði og bókasafns- og upplýsingafræði, m.a. í samvinnu við bókasafns- og upplýsingafræðiskor félagsvísindadeildar H.Í.
Samningur þessi er gerður á grundvelli laga nr. 71/1994, um Landsbókasafn Íslands – Háskólabókasafn. Samkvæmt 1. gr. laga nr. 71/1994 er safnið sjálfstæð háskólastofnun. Háskólaráð H.Í. tilnefnir tvo menn í stjórn þess og í 6. gr. laganna er tilgreint að það sé þjóðbókasafn og bókasafn Háskóla Íslands. Landsbókavörður situr háskólafundi Háskólans.
Í 1. mgr. 8. gr. laga nr. 71/1994, er gert ráð fyrir því að Háskólinn og safnið geri með sér sérstakt samkomulag m.a. um rekstur og fjárhagsleg samskipti.
Þessi samstarfssamningur tekur við af samkomulagi Háskóla Íslands og Landsbókasafns Íslands - Háskólabókasafns, dags. 8. júlí 1997 og grundvallast á þeim sjónarmiðum sem koma fram í samkomulaginu sjálfu og í greinargerð sem því fylgdi, að breyttu breytanda.
Í þágu sameiginlegra markmiða samingsaðila er með samningi þessum leitast við að nýta sem best sérþekkingu, kunnáttu, efnivið og aðstöðu þá sem samningsaðilar búa yfir. Samningurinn byggist á stefnumörkun aðila, annars vegar markmiðs- og aðgerðaáætlun Lbs-Hbs frá því í október 2003, Þekkingarveita á norðurslóð – Markmið og aðgerðir 2003 – 2006 (PDF) og hins vegar á Vísinda- og menntastefnu H.Í. frá 6. apríl 2001 og áætluninni Uppbygging Háskóla Íslands – markmið og aðgerðir 2002 – 2005.
Almennt gildir að starfsmenn og nemendur H.Í. hafa aðgang að allri þeirri þjónustu sem safnið veitir almenningi. Auk þess njóta nemendur, kennarar og aðrir starfsmenn H.Í. sérstakrar þjónustu í samræmi við framangreind markmið samningsins og önnur ákvæði hans. Sé annað ekki tilgreint er þjónusta safnsins til nemenda, kennara og annarra starfsmanna H.Í. gjaldsett skv. staðfestri gjaldskrá Lbs-Hbs.
2.1 Samstarfsnefnd um framkvæmd samningsins
Í samstarfsnefnd um málefni samningsins og samskipti samningsaðila sitja tveir menn, annar skipaður af háskólaráði og hinn af stjórn Lbs-Hbs. Hlutverk samstarfsnefndarinnar er:
- Að sjá um framkvæmd samningsins og undirsamninga er honum tengjast og gera áætlanir um framkvæmdaatriði þeirra.
- Að fjalla um sameiginleg málefni svo sem breytingar á störfum sem tengjast báðum stofnunum.
- Að eiga frumkvæði að endurskoðun samningsins ef ástæða þykir til.
3 Samstarf um ritakaup og önnur akademísk málefni
Stofnanirnar eru sammála um að eiga náið samstarf um kaup á ritum og öðrum upplýsingagögnum. Fé sem háskóladeildir ætla til ritakaupa er ráðstafað í gegnum safnið í samræmi við verklag sem sérstaklega skal staðfest. Upplýsingar um fé til ritakaupa skulu sendar safninu þegar að lokinni gerð fjárhagsáætlunar H.Í. í janúar ár hvert. Fjárreiðusvið H.Í. sér um að inna af hendi þetta árlega fjárframlag fyrir H.Í. í heild, með tveimur jafnháum greiðslum, þann 1. mars og 1. september.
Stofnanirnar eru sammála um nauðsyn þess að auka fé til efniskaupa vegna rannsóknanáms, m.a. með framlagi H.Í. til kaupa á rafrænum gögnum.
Stefnt skal að því að allar deildir Háskólans hafi tengilið í safninu. Æskilegt er að tengiliður safnsins hafi góða þekkingu á fræðasviði deildarinnar og til hans geti deildarmenn leitað um sín málefni.
Jafnframt starfa samstarfsnefndir deilda og safnsins. Nánar er fjallað um hlutverk þessara nefnda í undirsamningi (sjá fylgiskjal 2).
Stofnanirnar munu efla samvinnu sína um þjálfun nemenda, kennara og annarra starfsmanna H.Í. í heimilda- og upplýsingaleit sem og notkun bókasafna, þar með talin notkun rafrænna gagna. Safnið mun skipuleggja námskeið um upplýsingaleiðir sem löguð eru að þörfum einstakra hópa nemenda eða kennara.
4 Aðstaða fyrir nemendur
Stofnanirnar munu sameiginlega vinna að því að afgreiðslutími safnsins mæti þörfum stúdenta Háskólans fyrir lesrými og þjónustu eins og frekast er kostur. Safnið tekur frá lessæti sérstaklega ætluð nemendum Háskólans.
Safnið leggur til tvö lesherbergi fyrir hreyfihamlaða og sjónskerta nemendur H.Í. sem Háskólinn hefur forgang að, sbr. sérstakan samning þar að lútandi (fylgiskjal 3). Námsráðgjöf Háskólans (NHÍ) úthlutar þessari aðstöðu.
Jafnframt leggur safnið til afnot hópvinnuherbergja fyrir nemendur Háskólans.
5 Starfsmannamálefni
Starfsmenn safnsins hafa aðgang að Sáttmálasjóði, minni styrknum, á sama hátt og starfsmenn stjórnsýslu Háskólans. Í gildi er einnig sérstakur samningur safnsins við Háskólann um framlag í Rannsóknasjóð H.Í. (fylgiskjal 4) og eiga starfsmenn safnsins rétt á að sækja um styrki úr sjóðnum, í samræmi við reglur sem um hann gilda.
Starfsmannastjórar beggja samningsaðila hafa samstarf um fræðsluáætlanir stofnananna þannig að starfsmenn þeirra geti nýtt sér námskeið sem í boði verða á hvorum staðnum sem er og á sömu kjörum. Ef til þess kemur að beita verði fjöldatakmörkunum, munu starfsmenn þeirrar stofnunar sem sér um viðkomandi námskeið eiga forgang.
Um endurmenntun á vegum háskóladeilda gilda reglur þar að lútandi sem eru grundvöllur samninga safnsins við einstakar deildir.
Ef öðrum samningsaðilanum tekst að semja um sérkjör fyrir sína starfsmenn varðandi afslátt af vörum eða þjónustu munu starfsmenn hins aðilans eiga sama rétt.
6 Fjárhagsmálefni
6.1 Rekstur útibúa safnsins
Safnið rekur útibú í einstökum húsum Háskólans og eru þau flokkuð með tilliti til þeirrar þjónustu sem starfsmönnum og stúdentum Háskólans er þar veitt (fylgiskjal 5).
6.2 Gjaldsetning á þjónustu safnsins
- Bókasafnsskírteini (án endurgjalds fyrir starfsmenn og nemendur H.Í.)
- Upplýsingaþjónusta
- almenn (án endurgjalds)
- flóknar upplýsingaleitir (gegn gjaldi) - Afsláttur er veittur af tiltekinni þjónustu:
- millisafnalán (50%)
- leiga á fyrirlestrasal, kennslustofu og tölvuveri (50%) - Notendafræðsla og önnur þjónusta (án endurgjalds)
6.3 Þjónusta Reiknistofnunar Háskólans (RHÍ) og samvinna við safnið
Reiknistofnun Háskólans veitir safninu margvíslega þjónustu vegna tölvubúnaðar, netaðgangs og símkerfis og safnið veitir stúdentum og starfsmönnum Háskólans aðgang að tölvubúnaði og prenturum. Þessi þjónusta og samvinna er nánar tilgreind í fylgiskjali 6.
7 Önnur ákvæði
Safnið hefur, eins og aðrar háskólastofnanir, heimild til þess að nýta gestaíbúðir Háskólans.
Stofnanir H.Í. og einstakir starfsmenn Háskólans geta sótt um sýningaraðstöðu á 2. hæð safnsins. Ekki er innheimt gjald fyrir þessa aðstöðu.
Fylgiskjöl:
- Viðmið um opnunartíma safnsins almennt og á annatímum [PDF 13k]
- Samningur um samstarfsnefndir háskóladeilda og Lbs-Hbs [PDF 17k]
- Samningur Lbs-Hbs og NHÍ [PDF 28k]
- Samningur Lbs-Hbs og H.Í. um framlög í rannsóknasjóð H.Í. [PDF 108k]
- Viðmið um starfsemi útibúa Lbs-Hbs í einstökum húsum Háskólans [PDF 22k]
- Samvinna Reiknistofnunar Háskóla Íslands (RHÍ) og Landsbókasafns Íslands – Háskólabókasafns (Lbs-Hbs, “safnið”) [PDF 12k]
Gildistaka
Samstarfssamningur þessi gildir til fimm ára frá undirritun og tekur við af samkomulagi sem gert var á milli Háskóla Íslands og Landsbókasafns Íslands - Háskólabókasafns, dags. 8. júlí 1997. Heimilt er að gera breytingar á samningnum á gildistíma hans með samþykki samningsaðila.
Gert í Reykjavík, 18. ágúst 2004,
F.h. Háskóla Íslands F.h. Landsbókasafns Íslands - Háskólabókasafns
Páll Skúlason, háskólarektor Sigrún Klara Hannesdóttir, landsbókavörður