Stofnun rannsóknasetra Háskóla Íslands er rannsókna- og þjónustustofnun sem heyrir undir Háskólaráð. Stofnunin byggist á rannsóknasetrum Háskóla Íslands á landsbyggðinni sem eru faglegar og sjálfstæðar einingar.

Stofnunin er vettvangur samstarfsverkefna Háskólans við sveitarfélög, stofnanir, fyrirtæki, félagasamtök og einstaklinga á landsbyggðinni. Markmið stofnunarinnar er enn fremur að skapa aðstöðu til rannsókna á landsbyggðinni, auka möguleika almennings til menntunar og styrkja tengsl Háskóla Íslands við atvinnu- og þjóðlíf.

Forstöðumaður Stofnunar rannsóknasetra Háskóla Íslands er Rögnvaldur Ólafsson.

Frá árinu 1998 hefur á vegum rektors Háskóla Íslands verið unnið að því að efla tengsl skólans við landsbyggðina, m.a. með því að fjölga rannsókna- og fræðasetrum Háskóla Íslands um landið.

Markmiðið með þessu kom fram í ræðu Páls Skúlasonar, þáverandi rektors Háskóla Íslands, á Austurlandi árið 1999: „Hlutverk Háskóla Íslands er og hefur alla tíð verið að þjóna allri íslensku þjóðinni. Háskólinn er þjóðskóli sem vinnur jafnt í þágu þeirra sem búa á höfuðborgarsvæðinu og hinna sem búa úti á landi. Fræðastörf og þekkingarleit er ekki bara fyrir fámennan hóp fólks. Allt fólk sem vill bæta lífsskilyrði sín, treysta atvinnulíf, viðskipti og menningarlíf, hagnýtir sér í síauknum mæli alls konar fræði.“

Upplýsingar um fræðasetrin er að finna á vef Stofnunar rannsóknasetra Háskóla Íslands

Önnur verkefni Háskóla Íslands á landsbyggðinni

Háskóli Íslands býður uppá fjarnám í ýmsum greinum, m.a. námsráðgjöf, opinberri stjórnsýslu, ensku, íslensku og sagnfræði. Auk þess vinnur háskólafólk að margvíslegum verkefnum í samstarfi við aðrar rannsóknastofnanir, fyrirtæki og félagasamtök á landsbyggðinni. Sem dæmi um önnur verkefni Háskólans á landsbyggðinni má nefna:

- Rannsóknamiðstöð í jarðskjálftaverkfræði á Selfossi
- Samningur við Náttúrurannsóknastöðina við Mývatn
- Íþróttafræðasetur Menntavísindasviðs Háskóla Íslands á Laugarvatni