Fyrst skipuð 3. október 1985.
Kennslumálanefnd er sjö manna nefnd sem háskólaráð skipar til þriggja ára í senn. Í nefndinni eiga sæti formaður, skipaður af rektor, formenn kennslunefnda fræðasviðanna fimm og einn fulltrúi stúdenta, tilnefndur af Stúdentaráði.
Skipuð til 30. júní 2014:
- Róbert H. N. Haraldsson, prófessor í Sagnfræði- og heimspekideild, formaður
- Sif Einarsdóttir, dósent í Félags- og mannvísindadeild, formaður kennslunefndar Félagsvísindasviðs
- Sesselja S. Ómarsdóttir, dósent í Lyfjafræðideild, formaður kennslunefndar Heilbrigðisvísindasviðs
- Sveinn Yngvi Egilsson, prófessor í Íslensku og menningardeild, formaður kennslunefndar Hugvísindasviðs
- Hafdís Ingvarsdóttir, prófessor í Kennaradeild, formaður kennslunefndar Menntavísindasviðs
- Hjálmtýr Hafsteinsson, dósent í Iðnaðarverkfræði-, vélaverkfræði- og tölvunarfræðideild, formaður kennslunefndar Verkfræði- og náttúruvísindasviðs
- Stefán Þór Helgason, nemi í viðskiptafræði, fulltrúi stúdenta
Þórður Kristinsson, sviðsstjóri kennslusviðs, Hreinn Pálsson, prófstjóri, og Guðrún Geirsdóttir, stjórnarformaður Kennslumiðstöðvar, starfa með nefndinni.
Hlutverk kennslumálanefndar er að vinna að þeim markmiðum stefnu Háskóla Íslands er lúta að námi og kennslu. Í því felst að stuðla að þróun kennslu og kennsluhátta við Háskóla Íslands og vinna á annan hátt að því að nemendur öðlist framúrskarandi menntun í nánum tengslum við rannsóknastarf skólans.
Einstök verkefni kennslumálanefndar eru samkvæmt erindisbréfi:
- að vera rektor, háskólaráði og háskólaþingi til ráðuneytis um hvaðeina er lýtur að kennslu, kennsluháttum, rannsóknatengdu framhaldsnámi og þróun og nýmælum á sviði náms og kennslu;
- að hafa með hendi samræmingu á kennslustefnu deilda eftir því sem við á í samráði við kennslunefndir fræðasviða;
- að stuðla að því, í samvinnu við kennslunefndir fræðasviða, að framkvæma markmið Stefnu Háskóla Íslands 2011-2016 er lúta að námi og kennslu;
- að standa fyrir gæðamati á kennslu við Háskóla Íslands, m.a. með reglubundnum kennslukönnunum fyrir nemendur í grunnnámi annars vegar og framhaldsnámi hins vegar, og stuðla að því að matinu verði fylgt eftir og það nýtt í þágu bættrar kennslu;
- að tryggja að fræðasvið og deildir Háskólans skilgreini og uppfæri reglulega hæfniviðmið fyrir allar námsleiðir og námskeið, í samræmi við viðmið um æðra nám og prófgráður á Íslandi;
- að þróa aðgerðir til að nýta upplýsingar úr kennsluferilsskrám við mat á fastráðningum, við framgang og við umbun fyrir kennsluframlag. Stuðla skal að samræmingu kennsluferilsskráa milli fræðasviða;
- að stuðla að umræðum og málþingum innan Háskólans og utan um nám, kennslu og kennsluhætti, tengsl kennslu og rannsókna og annað það sem bætt getur þá menntun sem nemendur öðlast við Háskólann;
- að stýra Kennslumálasjóði Háskóla Íslands og annast úthlutanir úr honum, eftir því sem fjárráð leyfa;
- að tilnefna kennara vegna árlegrar viðurkenningar fyrir lofsverðan árangur í kennslu;
- að stuðla að samvinnu milli Háskóla Íslands og annarra íslenskra háskóla;
- að annast tengsl Háskóla Íslands við skóla á lægri skólastigum, m.a. með því að sjá til þess að fræðasvið og deildir skilgreini þær kröfur sem gera þarf til nemenda um þekkingu og færni við innritun og leitast á annan hátt við að tryggja að nemendur á lægri skólastigum fái nauðsynlegar upplýsingar og undirbúning fyrir háskólanám;
- að sinna öðrum málum sem rektor, háskólaráð eða háskólaþing kunna að fela nefndinni.
Kennslumálanefnd hefur samstarf við aðrar starfsnefndir háskólaráðs, einkum gæðanefnd, kennslunefndir fræðasviða, aðstoðarrektor vísinda og kennslu, kennslusvið, gæðastjóra, Kennslumiðstöð og Miðstöð framhaldsnáms eins og við á hverju sinni.
Nánari upplýsingar um kennslumálanefnd, kennslukönnun og kennslumálasjóð eru á innri vef Háskólans.